مه‌رگه‌ساته‌که‌ی هه‌ڵه‌بجه‌

حه‌سه‌ن پێنجوێنی

2006

ڕۆژهه‌ڵات

ناوه‌ندی ڕۆشنبیر

دیمه‌نی ئه‌و ڕۆژه‌مان پیشان ده‌دات که‌ به‌ گازی کوشنده‌ی خه‌رده‌لی ئینگلیزی و سیانوری ئه‌ڵمانی، و به‌ کۆمه‌کی و پشتیوانی ئه‌مریکا ئاواتی مه‌یلله‌تی کوردیان سوتاند و شایی و شادییان کرده‌ شیوه‌ن و پێکه‌نینه‌کانیان سه‌ربــڕی و به‌رگی بووکێنییان دزی و به‌رهاریان کرده‌ پایز... به‌ ناپاڵم و بۆمبا هێشووییه‌کان هه‌ڵه‌بجه‌ بۆمباران کرا. ناڵه‌ی سیخۆ و گرمه‌ی میک و زرمه‌ی سارووخ و ورمه‌ی بۆمباکانی رووسی دنیایان ده‌له‌رزانده‌وه‌. چه‌ندان ریزه‌ماڵ رووخا و ساراکڵ بوو. هه‌زاران ژن و منداڵ و خه‌ڵکی بێ چه‌ک کوژران و شه‌هید کران ... سێ ڕۆژی مابوو بۆ نه‌ورۆز که‌ریم هه‌ستی ده‌کرد به‌هاری ئه‌مساڵ وه‌ک ساڵانی پێشین نییه‌، شاره‌که‌ی به‌رگی خه‌م و ماته‌مینی داکه‌ندووه‌ و پۆشاکی نوێی پۆشیوه‌ بۆ شایی و زه‌ماوه‌ندی گه‌یشتن به‌ دڵخواز.. ئه‌و ڕۆژه‌ جه‌ژن و شادی بوو، چونکه‌ خه‌ڵکی به‌ جگه‌ر گۆشه‌و خۆشه‌ویستانیان شاد ببوونه‌وه‌، برا به‌ برا و باوک به کوڕ، و منداڵ به‌باوکی، و ژن به‌ مێردی، ئه‌وانه‌ی زۆر له‌ مێژ بوو چاوه‌ڕوانی دیتنیان بوون، زۆر به‌ ئاوات بوون رۆژێکی وا بێته‌ پێش وا هاتووه... کابووسی شووم و مێرده‌زمه‌ی ئێسک قورسیان لێ دوور که‌وتۆته‌وه‌، ئیتر دێهاته‌ کاولکراوه‌کان ئاوه‌دان ده‌که‌نه‌وه‌، کانیاوه‌ به‌ چیمه‌نتۆ پـڕکراوه‌کان پاک ده‌که‌نه‌وه‌. جارێکی تر هاژه‌ی شه‌تاوه‌کان ده‌بیستن، جارێکی دی باخ و بێستانه‌ وشککراوه‌کان زیندوو ده‌کرێنه‌وه‌، کالای سه‌وز ده‌پۆشن و به‌رهه‌می پـڕ پیت و به‌ره‌که‌تیان ده‌ده‌نه‌وه‌، به‌ڵێ، هه‌موو له‌م خۆشی و شادییه‌دا بوون، خه‌یاڵ و ئاوه‌ته‌کان ئاوێته‌ ببون و خه‌ونیان پێوه‌ ده‌بینین، وایان ده‌زانی ئاسۆ زۆر روونه‌ و به‌کامه‌رانی و به‌خته‌وه‌ری ئاوسه‌، ئه‌وته‌ زاڵم گۆڕی گۆم بووه‌ و بارگه‌ و بنه‌ی پێچاوه‌ته‌وه‌، رسواو زه‌لیل بووه‌، ئه‌وه‌ی تیا چوو چووه‌، و ئه‌وه‌ی هه‌ڵهات ده‌رچووه‌، و ئه‌وه‌ی جێما به‌ دیل گیراوه‌! با گوێ بۆ که‌ریم بگرین و گۆشه‌یه‌ک له‌و مه‌رگه‌ساته‌ی هه‌ڵه‌بجه‌مان بۆ بگێڕێته‌وه‌ که‌ به‌ چاوی خۆی بینیویه‌تی و له‌گه‌ڵیا ژیاوه‌ ...